El comisionáu pal Retu Demográficu, Jaime Izquierdo, qu’en tou esti tiempu nun foi quien a implementar dala llei o midía concreta que traiga de vuelta a los asturianos emigraos o facilite quedar a quien asina lo quiera, dio agora cola solución pa que, polo menos en cifres, se solucione’l problema “que s’atraiga xente de fuera”
Seguir echando a los asturianos con condiciones llaborales indignes y abandonu de los pueblos. Atrayer a xente de fuera que te dimpuesto a trabayar en condiciones indignes y a apinase en ciudaes. Pel camín, desaniciar una cultura y unes formes de vida que mos definen y esplotar al qu’aporta a Asturies atrayíu pola necesidá y la desconocencia de la situación que va topar equí.
La receta perfecha pal capitalismu español, non mui allonxada del sistema franquista de traer a les mines asturianes a andaluces y estremeños, menos daos a reclamar drechos llaborales y que nun cuntaben col respaldu d’una tierra que trabayar.
Rescampla un toque xenófobu y asturfóbicu a un tiempu: creer que’l de fuera merez ser esplotáu al empar que s’echa a pataes al d’equí porque nun trae cuenta. Sicasí, tampoco furrula. Nun ser asturianu nun equival, pesi a lo que diga Izquierdo, a aguantalo too y en total foron namás 21 los inmigrantes qu’aportaron a Asturies nos caberos 12 meses. La mayoría del contixente foriatu actual viviendo n’Asturies ye español, seguios de senegaleses, chinos y cubanos.
En xeneral es rempuestes de Jaime Izquierdo na segunda comisión pol retu demográficu nun apurrieron res nuevo y tuvieron de fechu un tonu pente’l cachondéu ya’l dispreciu, dando a entender que n’Asturies nun se tien más fios porque nun se lleva, que’l problema ta en que la xente quier muncho a los sos perros y que la man d’obra se tien d’atrayer ye la foriata “A qué me dedico? A lo mesmo que va un mes, a intentar buscar soluciones”. Cobrar por “intentar buscar” cuando s’aportó a esta situación llende nun ye, o nun tendría de ser el so trabayu
Les soluciones tan na punta los deos: dotar de servicios y comunicaciones los pueblos pa que la xente nun tea de colar por falta de cuestiones tan básiques comu escuela, mélicu o carretera y potenciar seutores productivos que creen trabayu non precariu -pista, hostelería y turismu nun cumplen esa premisa-. El mundiu ta apináu d’asturianos y asturianes naguando por volver.
Entantu, a quien venga a Asturies a la gueta d’una bona vida afálolu a integrase -como de fechu munchos faen- na cultura asturiana, deprender la nuesa llingua, los nuesos vezos, vivir comu la xente d’equí, defender los sos drechos tamién comu un d’equí. Como dixo un notable asturianu, cantaor de tonada y echaor de sidre d’orixen dominicanu, “Un asturianu ñaz onde-y da la gana”.
Xicu Llamazares
This work is licensed under a Creative Commons Attribution 4.0 International License.
