La batalla perdía pola oficialidá da puxu a los que quieren finar col asturianu. La falta de la mesma foi la esculpia pa volver atrás tolos avances fechos pola Universidá d’Uviéu y val tamién d’argumentu a Demarcación de Carreteres pa nun respetar la toponimia
De pocu valen lleis d’usu, alcuerdos, normatives ya inventos varios ensin oficialidá. Los topónimos oficiales son los que tienen d’usase, en virtú a lo recoyío na Llei 1/1998, de 23 de marzu d’Usu y Promoción del Asturianu, qu’afita nel so artículu 15, relativu a la toponimia, que “los topónimos de la Comunidá Autónoma d’Asturies tendrán la denominación oficial na so forma tradicional. Cuando un topónimu tea usu xeneralizáu na so forma tradicional y en castellán, la denominación podrá ser bilingüe”. Pero toos sabemos que la llei d’Usu que s’aprebó va cuasi un cuartu sieglu nun camudó res, basicamente porque enxamás nun foi cumplía.
En respuesta a la reclamación presentada en marzu por Iniciativa pol Asturianu, tres detectar l’incumplimientu de la toponimia oficial nes señales nueves de la glorieta de la N-634 n’El Berrón (Siero), que nun recueyen les formes tradicionales y oficiales La Pola Siero y Uviéu, Demarcación de Carreteres del Estáu n’Asturies argumenta que “en comunidaes autónomes que tuvieren como únicu idioma oficial l’español, los nomes propios de les poblaciones escribiránse únicamente en español”, faciendo papel moyao de la Llei d’Usu.
Iniciativa pol Asturianu sube’l nivel de la so reclamación y encamienta agora al Ministeriu de Tresportes, Movilidá y Axenda Urbana del Gobiernu d’España a cumplir cola Llei d’Usu en materia de toponimia-
El procesu de recuperación de la toponimia tradicional depende de la Xunta Asesora de Toponimia del Principáu d’Asturies, constituyida formalmente nel añu 2002 como muérganu consultivu al que-y correspuende, ente otres funciones, el dictame previu a la determinación de los topónimos pol Conseyu de Gobiernu. Nos casos concretos de Siero y Uviéu esti procesu compeltóse en 2009 y 2019 respeutivamente, siendo namás oficial la forma La Pola Siero y con doble denominación nel casu d’Uviéu. Anguaño, 73 de los 78 conceyosd’Asturies yá completaron esti procesu, tando los cinco conceyos onde entá nun se completó -Ayande, Cuideriu, Ibias, Navia y Somiedu- n’estudiu.
Redaición InfoAsturies
This work is licensed under a Creative Commons Attribution 4.0 International License.
