Ya podemos decir que tamos censaos fasta los mesmos: la Casa Conceyu de Xixón pidi a tolos que tengan pites, corios u otres aves de consumu que se den d’alta nun “censu aviar”
Llucía F. Marqués
Va unos años sentí una d’eses hestories que tantu abonden nel surrealismu alministrativu’l nuesu país: un hotelín rural, que cuntaba con piteru propiu, permitía a los neños que s’allugaben ellí recoyer los güevos de les pites pa llueu comelos, una idega aparentemente prestosa ya inocente que permitía a la reciella comprender que los güevos nun vienen empaquetaos en docenes de serie. Un díi d’estos aprució perende la Pantasma del Control Llegal, multándolos por sirvir güevos “ensin procedencia demostrable” (¿¡!?), ya que nun pasaren pol rexistru de sanidá y nun llevaben el correspondiente alcuñu. Nun hai que dicir que’l piteru en cuestión quedó clausuráu. Como anéudota diré que tamién recibieron un apercibimientu por tener una araña dientro casa, en mediu’l monte (yera un arácnidu ocasional, non domésticu nin afincáu na casa, esclario)
Vienme esta hestoria a la tiesta al lleer la noticia del censu de pites que se va facer en Xixón (y al paecer más alantre tamién en Corvera, Castropol, Gozón, Ribesella, Tapia Casariegu, Vegadeo y Villaviciosa, toes elles “fasteres d’especial xixilancia”).
El censu, nel que tien que dir a apuntase los propietarios de motu propiu, ta empobináu a los que tean aves de piteru non comerciales, seya que les tengan pa carne, güevos o cenciellamente por árruelu. El motivu esgrimíu ye la prevención d’una posible futurible gripe aviar, que diba ser meyor controlada casu de saber cuantes aves hai nel conceyu, de qu’especie son, si viven o non al aire llibre, en que llugar y con qué sistema se críen (incubadora o natural) por supuesto con nome y señes de la persona responsable.
Nun toi cierta del valir que tenga esti censu casu d’andaz, másime cuando me costa qu’a la fin el porcentaxe censáu va ser ruinu pero éntrenme duldes de si, de magar agora sedrá multable tener pites ensin avisar. D’ehí a obligar a teneyos seguru y albeitre hai un pasu y d’eso a finar colos piteros pa consumu propiu otru. El casu paez complicar l’autuconsumu y la vida rural, poniendo pilancos a los vezos tradicionales de vida asturianos.
Tampoco queda nidio na midía si habrá qu’avisar de les variaciones de númberu y forma de cría que pasen los animales, seique espero que non, porque a esti pasu podremos dicir ensin riesgu d’enquivocanos aquello de que tamos de tanta burocracia fasta los güevos.
This work is licensed under a Creative Commons Attribution 4.0 International License.
