Recién s’anuncia en Xixón la costrución d’un nuevu hospital priváu de la compañia sanitaria llíder del estáu n’hospitales, clíniques y residencies. Llevantaráse en dos parceles de titularidá municipal en Nueu Xixón, con un total de 17,756 metros cuadraos. Baltaránse pa ello dos áries recreatives d’usu públicu y a cambiu’l grupu Quirón apurrirá 12.379 metros cuadraos pa l’ampliación del Hospital de Cagüeñes. Ello ye, regalaránse más de 5.000 metros cuadraos a la empresa privá pa qu’istale un hospital, que prestará los servicios que tendría d’apurrir la sanidá pública, afondando asina nel procesu de tornar el drechu a l’atención mélica de calidá nun privilexu d’unos pocos, los que puedan pagalo.

La empresa nun escuende les sos intenciones, ufrir servicios y ciruxíes que fasta agora nun esistíen  fuera de la rede pública, p’atrayer con ello a clientes que nun quieran esperar les inacabables llistes d’espera de los hospitales públicos asturianos, un negociu que nun sedría rentable si el serviciu públicu cubriere les necesidaes de los asturianos, polo que son abondes les voces que venceyen el desdexamientu de la salú pública comu un allanamientu de camín pa les empreses de sanidá privada, principales beneficiarios del progresivu desaniciu de l’atención mélica universal n’Asturies.

La promesa de contratar a 300 persones pente sanitarios y personal ausiliar desmiente tamién l’argumentu de falta de profesionales qu’esgrime’l Gobiernu d’Asturies pa esculpiar la non contratación de personal sanitariu que cubran les necesidaes de la salú pública.