Dientro’l desmantelamientu progresivu d’Asturies ya del so texíu económicu y social, el preslle de les mines ye quiciás la mayor traxedia que sescudió el país na nuesa hestoria reciente. Los “Fondos Mineros” diben restañar esa firía, creando emplegu na zona y apangando la sangría demográfica; pero una bones l’emplegu nun apaez cabe entrugase ¿Aú los Fondos Mineros?
La rempuesta ye múltiple, sobres, bolsinos y negocios d’amigos debuxen la mafia clientelar que carauteriza’l repartu de fondos asturianu va décades. Sicasí, pa poner cifres y datos concretos, basta echar una güeyada a esti llistáu de 16 empreses qu’axuntaron un total de 47 millones d’euros y 1489 despidos, presllando dafechu seies d’elles; una -Sodes Fabricación- namás al añu de recibir 300.000 € de los Fondos Mineros, despidiendo a 70 trabayaores.
El casu más onerosu ye’l d’Alas Aluminium, que despidió a 258 emplegaos depués de cobrar 13’5 millones d’euros de les arques públiques, seique la repercusión social foi mayor en Vesubius, ya que’l preslle dafechu de la empresa, que recibiere 657.077 euros, afeutó gravemente a tola industria secundaria, dexando ruina nel conceyu enteru d’Avilés. Asemeyáu ye’l casu d’Autotex, que preslló dexando na cai a 207 trabayaores pesi a los tres millones d’euros que se-y concedieron pa torgalo o’l de Ventura XXI, con 73 despidos y 1’36 millones o la Panificadora Friovivo, que nun torgó el so preslle col cien por cien de la so plantilla, 40 persones, na cai. Nel cuadru axuntu puen vese más casos asemeyaos.
Les sospeches sobre’l destín fraudulentu de los Fondos Mineros surdieron dende l’entamu y Andecha Astur denunció’l desfalcu ya nel añu 2002, llevando en delles ocasiones el casu al Parlamentu Européu, pidiendo la intervencion de la OLAF ya entamando una dura campaña que punxo a la lluz una rialidá por toos conocía y por toos silenciada, bien porque los beneficiaba direutamente, bien porque nun tuvieron el valor precisu pa llantar cara a la mafia PSOE-SOMA-UGT.
Llucía F. Marqués
This work is licensed under a Creative Commons Attribution 4.0 International License.
