La Conseyería d’Educación y Cultura vien de facer pública nel BOPA la convocatoria de los Premios Lliterarios n’Asturianu correspondientes al añu 2.022.

Na so 43 edición, convócase’l Premiu Xosefa Xovellanos de novela n’asturianu pa obres de tema y cadarma llibres que seyan inédites,  y tengan una estensión mínima de setenta y cinco páxines a espaciu doble. Esta ye la edición cuarentena tercera.

El Premiu Xuan M.ª Acebal de poesía lleva 28 años premiando obres poétiques n’asturianu. Pa presentase la obra con una estensión mínima de quinientos versos.

Tamién 28 años cumple’l Máximo Fuertes Acevedo, que premia ensayos n’asturianu cola condición de que tengan una estensión mínima de cincuenta páxines escrites a espaciu doble.

Más nuevu ye’l Premiu María Josefa Canellada de Lliteratura Infantil y Xuvenil n’asturianu pa obres de lliteratura infantil o xuvenil —con independencia de que seyan noveles, compilaciones de cuentos, poemarios o obres de teatru—. Esta ye la edición decimoquinta.

Esta ye la decimocuarta edición del Premiu Alfonso Iglesias de cómic n’asturianu pa obres d’estilu,  que puen abarcar el desenvolvimentu d’una historia sola o un conxuntu d’histories, cola condición de que la estensión total de la obra tendrá un mínimu de 50 páxines, de les qu’habrá presentase un proyectu inicial con una estensión mínima de quince.

Dos años tien el Premiu Florina Alías a la Meyor Traducción al asturianu, que busca distinguir al traductor, traductora o traductores d’obres orixinales escrites en llingua estremada de la castellana o del gallego-asturianu o eonaviegu, de calter lliterariu y non lliterariu, y editaes (en formatu papel o en formatu dixital) y difundíes nel añu 2021.

La estaya más nueva d’estos concursos protagonizala la Narrativa Moza, col Premiu Enriqueta González Rubín de Narrativa moza en llingua asturiana, pa  noveles o escoyetes de cuentos, escrites en llingua asturiana, siendo requisitu que tengan una estensión mínima de 50 páxines a doble espaciu.

Fuera l’ámbetu estrictamente lliterariu, rescampla’l Premiu Camaretá al Meyor Cantar pa canciones con lletra en llingua asturiana o n’eo-naviego. Al premiu van poder presentase cantares de cualquier xéneru con lletra y música orixinal y cantares de cualquier xéneru con lletra orixinal sobre melodíes yá existentes. Nun casu y n’otru, editaes y difundíes al públicu a lo llargo del añu 2021 y hasta la fecha de la convocatoria de la edición presente. Cada solista o grupu musical interesáu va poder presentar al premiu un cantar namás. Esta ye la edición decimocuarta.

Estos premios, creaos pa potenciar, consolidar y arriquecer la creatividá de la llingua asturiana nel ámbitu lliterariu, teatral y musical, tienen una dotación de 5.000 euros, nel casu de los lliterarios, y de 6.000 euros nel casu de los otros dos premios.

El plazu de presentación de les obres acaba’l 16 de xunu. El fallu de los ganadores, como vien siendo vezu, va conocese nos caberos meses del añu.