La dilatación a costafecha de los procedimientos por parte’l “Principado” lleven a que, dos años y mediu depués del xuiciu y pesi a cuntar con prebes qu’avalen un desfalcu cercanu a los 6 millones d’euros l’Audiencia siga ensin poner cifra a la indemnización a pagar
Riopedre con Areces
Doce años depués d’una de les trames de corrupción, alxudicación irregular de contratos y robu de fondos públicos mayores de les munches que chisquen al executivu asturianu, na que tan implicaos altos cargos del gobiernu asturianu de la dómina del socialista Vicente Álvarez Areces -que “nun sabía na”-y cuatro años depués de la sentencia, el “Principado” reconoz que siguió 7 años pagando a la so fiel funcionaria, Marta Renedo Avilés, xefa de serviciu condergada pola so participación na trama de alxudicación irregular de contratos.
El “Principado” vien de reconocer agora que pagó a Marta Renedo’l so salariu 7 años depués de despedila pol casu de corrución, que rebautizaron col so nome pa separtalu de les implicaciones polítiques de pone-y el nome del principal responsable, Riopedre, Conseyeru d’educación y home de confianza del Presidente Areces. Los fechos tan probaos, la sentencia dictada. Los asturianos recuperamos un total de 487 € de los más de cinco millones robaos y esos menos de 500 € salieron d’embargar parte d’un salariu que nun tendría de pagase. Desconózse la cantidá pagá a Marta Renedo por nun trabayar.
Una riestra d’errores y xestiones mal feches lleven a que seya cuasi imposible recuperar les perres robaes a los asturianos. A estos altores queda tovía pendiente de calcular l’importe desfalcáu, ya que’l “Principado”, n’otru de fidelidá a la so xente, nun presentó a tiempu l’nforme qu’asegura qu’ente xineru de 2009 y agostu de 2010 la Conseyería d’Educación pagó más de cuatro millones por material non entregáu en 87 centros, pa lo que se falsificó la robla de polo menos 15 direutores de los cientros educativos.
Nel casu concretu de Marta Renedo, fore condergada pol Tribunal de Cuentes, n’avientu de 2017, a reintegrar 1,52 millones al erariu públicu, cola inconformidá manifiesta del entós presidente, el tamién socialista Javier Fernández, conocíu popularmente comu “el mudu”, quien s’opuso firmemente a que’l Tribunal de Cuentes investigare’l casu. Fasta agora d’esi millón y mediu van recuperándose 482 euros.
Nuria Prendes
This work is licensed under a Creative Commons Attribution 4.0 International License.
