Como ca añu, Andecha Astur cellebró, coincidiendo cola fin de selmana más averáu al 25 de mayu, el Díi d’Andecha, qu’esti añu tuvo comu protagonista la declaración del partíu de la so intención de crear un frente común asturianu d’izquierdes

Na intervención política que Mariano Suárez fexo nel marcu del XXV Díi d’Andecha, l’hestóricu militante d’Andecha Astur analizó la situación de cris demográfica, llaboral, socioeconómica y mediuambiental na que s’alcuentra Asturies, apuntando a les polítiques del Estáu español p’Asturies y a les sucursales de los partíos españoles n’Asturies comu responsables d’esta situación y valorando la situación como “insostenible, tan insostenible que naide pue dicir que non a un frente común pa defendemos”. Nesi mesmu sen, Mariano Suárez anunció la  intención d’Andecha Astur de centrar los sos esfuercios n’algamar un frente común sobro la base de la condición d’asturianu  y d’una izquierda amplia y participativa.

Esa propuesta, anunció, afitaríase nunos criterios mínimos “al rodiu los cualos pueda enartase una rempuesta común qu’ufra a la sociedá asturiana una ferramienta útil de defensa frente a les agresiones del Estáu español, y un mediu de tresformación social y recostrución nacional”.

Faló tamién del pelligru de lo que llamó los “proyeutos políticos millagru”, qu’apaecen en viespora d’elleiciones, xenerando desxunión y desaniciándose al pocu, al nun tener una base previa de trabayu real. Frente a ellos, insiste, ye necesario algamar un frente común de base amplia nel que se puedan afayar les estremaes formes d’espresión del asturianismu socialmente comprometíu.

Enantes d’entamar el XXV Díi d’Andecha, procedióse a la rialización d’una ofrenda floral a les puertes de la Sala Capitular onde tuvo llugar la declaración asturiana de Soberanía del 25 Mayu, cola qu’Asturies recuperó la independencia nel sieglu XIX.

Nuria Prendes

This work is licensed under a Creative Commons Attribution 4.0 International License.