Renfe desoi les desixencies de la coordinadora por un tren públicu social y caltenible   y cancela viaxes “por falta de maquinistes”, con una plantilla de 103 trabayaores menos que cuando entamó el problema de la falta de conductores nel 2017

¿Qué falten maquinistes? evidente. Nos años 2016 y 2017 entamaron les supresiones de frecuencies por falta de personal, entós la plantilla yera, a nivel estatal, de 789 emplegaos. Cincu años dempués son 686.

Estes supresiones impliquen un incumplimientu manifiestu del contratu que RENFE caltién col Ministeriu de Tresportes, qu’afita’l númberu de frecuencies en ca llinia a cambiu de cubrir el déficit comercial que conlleven, cola fin de caltener un servicu públicu que n’Asturies, con 469 frecuencies de cercaníes afitaes oficialmente nesi contratu, ye imprescindible pa vertebrar el tresporte públicu nel país.

Naide pue dicir que nun se vió venir, que nun sabíen lo que diba pasar, neto que nun puen negar que saben qu’una flota de trenes necesita caltenimientu, talo que les vies peronde pasen o incluso les máquines espendeores de billetes, que conllevaron tantos despidos nes taquilles pero que nun furrulen. ¿Porqué entos nun s’igüenlos problemes anantes de llegar a la supresión? ¿Hai dalgún enfotu específicu’n fundir el ferrocarril?. Falamos d’un mediu de tresporte con un gran potencial pa potenciar la economía de los territorios qu’atraviesa, meyorar la movilidá pente les sos poblaciones y reducir les emisiones d’efeutu invernaeru, tou ello nun contestu d’emerxencia climática que val d’esculpia pa midies más polémiques y menos efeutives pal control de la polución que’l sofitar los trenes.

Llucía F. Marqués