Les families acusen a la Conseyería de quitar paraes nel tresporte a la escuela col envís de presllala
Por munchu enfotu que ponga una familia en caltener viva la fastera rural, les ganes quítense si la reciella tien de caminar pa dir a escuela fasta kilómetru y mediu per una carretera pocu segura, ensin illuminación, pa garrar un autobús con un marxen d’horariu d’un cuartu d’hora p’arriba o p’abaxo, nuna parada ensin proteición y metanes una curva peligroso “N’iviernu ta escuro dafecho y hai hasta xabariles” cuenta la ma de 4 escolinos afeutaos. Fasta va pocu garrábenlos a la puerte casa, daqué que decidió a más families a apuntase al colexu, pero el cambiu quíta-yos la parada dende ya y cara al prósimu añu.
Nun viven metanes el monte, nun de los conceyos escaecios de les esnales asturianes, esto pasa al par de Xixón mesmo, en Montiana, onde dan clas lo rapacinos de San Andrés, Serín y Poago. Agora mesmo hai 25 escolinos en colexu, pero si baxaren de 15 el colexu presllaría, daqué que les families consideren que ye lo que se ta buscando al dificulta-yos les coses. Los pueblos interesen vacios y vieyos, la educación cuesta menos colos rapacinos en macroescueles urbanes qu’en colexos rurales y si pue ser que vivan cerca pa nun pagar tresporte, meyor.
Asina van presllando añu a añu colexos, cola esculpia de falta d’escolinos, unos escolinos que quisieren dir al colexu más cercanu, pero qu’escueyen dir al que ta lloñe porque’l bus del tresporte públicu ta más cerca, o incluso families qu’abandonen el campu ante la dificultá p’aportar a escuela pa dar a los sos fios una ensiñanza que, remembremos, nun ye solo drechu sinón obligación.
Llucía F. Marqués
This work is licensed under a Creative Commons Attribution 4.0 International License.
