La presión de los camareros al negase a trabayar por miseries entama a frutiar: los empresarios van pagar más en función de la formación; per otru lláu hai que ser prudentes, valdrá con contratar camareros ensin formación reglada y poner comu esculpia esa falta de formación pa pagar una ruindá
Llucía F. Marqués
Quiero ser optimista.
La clas trabayaora ganó una batalla, la decisión de nun trabayar nel seutor hosteleru en condiciones de miseria fuercia a los empresarios a plantegase midies correchores del mercáu llaboral, almitiendo pagar más por daqué qu’agora ye escaso. La patronal d’Hostelería y Turismu n’Asturies pautará colos sindicatos cambios significativos nel conveniu, incluyendo meyores salariales condicionaes al nivel de formación. Non, nun van pagar más a los cientos de titulaos universitarios que n’Asturies se ven forciaos a trabayar na hostelería o colar del país, falamos de formación n’hostelería. Asina qu’al paecer, los trabayaores ganaron y los 12.000 paraos que n’Asturies busquen trabayu nesi seutor específicu toparán darréu emplegu.
Quiero ser optimista pero nun soi tonta. Pa entamar, la formación principal que fae falta pa la hostelería asturiana -echaor/a de sidre-, nun esiste, asina que va ser abegoso pagar por ello. Pa siguir, na más cenciello que dexar a un lláu a los trabayaores formaos y contratar por una miseria a camareros ensin formación oficial, ya hai esculpia, haber estudiao.
Ye un pasiquín, si, pero pasiquinos nun son reblagos.
Per otru lláu nun pue dexar de sosprendeme la mediación, seique testimonial, del “Principado” nuna cuestión, comu esta, de calter llaboral, siendo el so vezu caltenese al marxe, comu fae n’Arcelor, Vauste y tantes otres. Igual tien que ver qu’esta vuelta los apuraos yeren los empresarios y non los trabayaores. Tampocu ye que s’enfotaren muncho, pa ser sinceros: na intervención al respeutu de Berta Piñán renunció a buscar causes o dar soluciones y faló -lliteralmente- del tiempu.
This work is licensed under a Creative Commons Attribution 4.0 International License.
