Si los barrios del oeste de Xixón tan definios pol so pasáu industrial ya’l so hestorial de llucha obrera, agora defínelos la contaminación, el paru, la precariedá y l’abandonu nel que’l conceyu de Xixón los tien sumios

Los vecinos de los barrios del Oeste de Xixón salieron anueche a la cai, lluces en man, faciendo un duple percorríu nel qu’una columna marchaba dende Xove y la otra dende Fátima, pa confluir na sablera l’Arbeyal, onde hebio música y revindicaciones nes que los vecinos pidieron que les sos demandes, dalgunes d’elles con décades, seyan sentíes y retrucaes pola alministración.

Denuncien que los sos barrios, siguiendo’l modelu asturianu de mimar el cientru y desdexar la periferia, son los grandes abandonaos de Xixón. El plan de movilidá nun cuenta coles necesidaes de los moraores d’esta fastera, el caltenimientu ye insuficiente, la precariedá ye xeneralizada y hai demandes, comu la solución a la barrera ferroviaria o a los acesos al Musel, que lleven fasta 20 años en pie.

Pente les principales vindicaciones, la toma de midies p’aparar la contaminación. Un estudiu del añu pasáu amuesa que nestos barrios muerren un 30% más de persones de les que cabría esperar por enfermedaes comu cáncanu de polmón, enfermedá pulmonar obstructiva crónica (EPOC).

This work is licensed under a Creative Commons Attribution 4.0 International License.