Un vidiu editáu pola revista LA SIDRA recibe más de mediu millón de visites en menos d’una selmana.
LA SIDRA.- Nel vidiu, que s’afaya colingáu na páxina ueb de LA SIDRA, vese como una ciervina pica a la puerte del chigre y espera a que Ladino, el chigreru de la Sidrería Les Praeres -Nava- dea-y de xintar unes mazanes. Too ello forma parte d’una perguapa hestoria que vos invitamos a conocer en direutu nel propiu chigre y de boca del propiu Ladino, mentes tomáis tranquilamente unes botellines.
Esti ésitu débese, aparte de lo guapo de la so temática, a la perimportante presencia de LA SIDRA nes redes sociales, con más de 2.000 seguidores en twitter onde escomenzaren a tar presentes va poco, y perpasando los 22.000 en facebook, colo que ca vegada qu’inclúin una noticia supéren davezu les 10.000 visites, y en munchos casos les 100.000, como foi la semeya d’Alexandra Castellanos echando un culín.
Nel vidiu en custión, hai de destacar non solo la cantidá de visites, más de 555.000 agora mesmo, sinon tamién el númberu reproduciones, 225.171, les 3.274 vegaes compartíu y les cuasique 1.400 rempuestes, ¡En menos d’una selmana!!!
This work is licensed under a Creative Commons Attribution 4.0 International License.
