La Comisión de Garantíes fore creada pa investigar el presuntu fraude elleutoral de les primaries de Podemos

Olga Blanco y Nicolás González, presidenta y miembru de la Comisión de Garantíes Democrátiques del partiu coinciden en que vieren irregularidaes dende’l mesmu díe de la cellebración de les elleiciones primaries de Podemos, pero intentaron tratar el casu con discreción, precurando facer el mínimu dañu al partíu al que pertenecen. Ellos nun teníen capacidá p’actuar d’oficiu y llevar el tema a los tribunales, pero tampocu quedaben tranquilos callando una presunta manipulación elleutoral. Si falen agora ye porque nun ven otru mediu d’encarar l’asuntu “Intentemos per tolos medios nun visibilizar la fractura pero nun mos quedó otru remediu”.

Tal comu denunciaren nel so momentu miembros de la candidatura “Asturies dende cerca”, agora dellos espedientaos, costituyérense tres “círculos” nuevos fuera de plazu, ello ye, que pola so fecha de creación  nun teníen acordies a los estatutos de Podemos drechu de votu. Precisamente foron los votos algamaos nestos nuevos círculos los que decantaron les elleiciones a favor del grupu llideráu por Sofía Castañón y Rafa Palacios, polo que se pon en duda la llexitimidá de la so elleición.

Darréu les primeres denuncies de miembros del partíu, al mesmu díe viniente de les primaries, costituyóse esta Comisión pa resolver l’enguedeyu. El primer pilancu col que topó la Comisión foi la imposibilidá d’aceder a la so propia cuenta de corréu y la negativa por parte de la nueva direutiva de crear otru, asina comu a facilitar la información requirío, lo que dexó a la Comisión de Garantíes imposibilitada pa facer al so trabayu, menaciando entós esta a la cúpula con emprender aiciones llegales si esto nun se solucionaba. Foi necesaria la intervención a nivel estatal pa que se desbloquease esa cuestión, pero pa entos ya perdieren muncho tiempu y ante lo que definen como un boicot continuu deciden agora dimitir en pleno, dexando nel aire quien va investigar les presuntes irregularidaes nes elleiciones primaries del partíu que prometiere finar cola corrupción con “una nueva forma de faer política”.

Nuria Prendes

This work is licensed under a Creative Commons Attribution 4.0 International License.