Esta mañana na Plaza Conceyu de Xixón tuvo llugar una concentración en defensa la Sanidá Pública Asturiana y en refuga de la privatización de los servicios sanitarios
“Stop Quirón” y “Sanidá Pública vergüenza” yeren los llemes que los participantes concentraos amosaben en grandes lletres, faciendo referencia a la prósima implantación, con tol sofitu del conceyu Xixón, d’una nueva macro clínica privada que vendría a prestar los servicios que’n xusticia tendría d’ufrir la sanidá pública, pero reservaos a quien los pueda pagar.
Sanidá Pública, más recursos, más calidá, resumía’l cartelu d’Andecha Astur les vindicaciones de los concentraos, reclamando pal serviciu públicu los medios que precisa pa poder prestar una atención de nivel dignu a la población.
La reclamación de una sanidá pública de calidá y la denuncia de la so progresiva privatización ye una demanda costante na cabera década, pero el procesu ta viéndose aceleráu de magar l’andanciu, que punxo n’evidencia les carencies del sistema de salù pública asturiana.
This work is licensed under a Creative Commons Attribution 4.0 International License.
