Ante un conveniu llaboral que precariza más entá el trabayu de les curiaores d’aida en domiciliu, el SAD vien d’entamar una fuelga indefinía de curiaos qu’arrincó ayeri con un multitudinariu manifestamientu peles cais d’Uviéu. Les repercusiones nuna población avieyada, comu l’asturiana, na que la emigración de la mocedá dexa solos a los mayores, tien de ser tremenda, incluso colos descomanaos servicios mínimos impuestos por delles empreses.

Nun escuchar les sos revindicaciones implica non solo condergar a un seutor llaboral enteru -formáu cuasi esclusivamente por muyeres- a condiciones indignes de trabayu, sinón dexar ensin curiaos a la población más vulnerable. Del gobiernu de Barbón, “socialista”, depende caltener el pulsu a quienes revindiquen en xusticia o facer oyios sordos tamién nesti casu a les revindicaciones del pueblu asturianu.

La hestórica falta de xunidá d’esti seutor, nel que los contautos pente trabayaores n’horariu llaboral son cuasique inesistentes, franció demientres el confinamientu, cuando el so trabayu se fizo más necesariu, y de magar entós les protestes socédense, ensin que fueren escuchaes.

Nel 2020 les pallabres d’Adrian Barbón frenaron les sos movilizaciones con falses promeses qu’entá nun se materializaron, ya’l nuevu conveniu, lloñe de meyorar la so situación, afita condiciones entá más denigrantes, polo que vienen d’entamar esta fuelga indefinía, que se cellebra non solo contra la patronal sinón contra los sindicatos mayoritarios que, lloñe de defender los drechos de les trabayaores, llamaronles a la sumisión y el silenciu.

Les concentraciones continuarán demientres la fuelga, siendo diaries en Xixón y col calendariu marcáu a continuación n’Uviéu, Avilés, Llangréu, Sieru y Mieres.