L’añu ta siendo duru pa los asturianos. Xubíes descontrolaes de precios, restriciones enerxétiques y complicaciones delles pa les que siempres hai una esculpia esterna, guerres llonxanes, andancios, fuelgues de tresporte, desequilibriu, cambeu climáticu… cualisquier noticia implica que, mañana, el pan tará más caro, l’ERE achisba dende’l requexu. Asina les coses, aprietamos el cinchu y asumimos la -etenra- mala racha.

Sicasí, echando una güeyada a les cifres de les grandes compañíes qu’operen n’Asturies, tantu les asturianes comu multinacionales, decatámonos de que les coses nun cuadren. Les grandes empreses dispararon los sos beneficios na primer metá d’añu.

7.926 millones d’euros de beneficiu netu distribuyíu p’Arcelor Mittal nel so meyor semestre de magar el 2008, que sicasí sigue paralizando la inversión y negando a los sos trabayaores una negociación en condiciones. 2.993 millones de euros pal grupu químicu y farmacéuticu alemán Bayer, en contraste colos númberos encarnaos de 246 millones contabilizaos na primer metá del 2021 y con previsión de meyorar na segunda metá l’añu. Otros 768 millones d’euros pa Dupont, una meyora del 64,6% en comparación col mesmu periodu de 2021 y 746 millones pa la Thyssen.

Cientrándomos n’empreses asturianes, tenemos a ALSA, que depués de tolos conflictos llaborales algama un beneficiu de 52 millones d’euros nos seis primeros meses del añu, multiplicando por 50 les cifres del añu anterior. La connivencia col Principado, que permite siguir estrozando los montes con ocalitos, permite a ENCE algamar un beneficiu netu atribuyible de 45 millones, en progresión ascendente, cifra que contrasta colos 195 millones que perdió la papelera en 2021. 2,4 millones de beneficiu pa la General de Alquiler de Maquinaria (GAM), una vuelta de tornes depués de los 800.000 euros de perdes nel mesmu periodu l’añu pasáu.

Méxenmos enriba, dícenmos que llueve.

This work is licensed under a Creative Commons Attribution 4.0 International License.