Los montes asturianos tan estraos de resclavos de la guerra que nellos tuvo llugar contra los ataques del exércitu facista español, pente los que destaquen el conxuntu de fortificaciones llevantaes na dómina’l Conseyu Soberanu, que costitúi un padremuñu arqueolóxicu, hestóricu y cultural d’un valor cimeru p’Asturies y Lleón
La política militar del Conseyu Soberanu, que cumple agora’l 85 aniversariu de la so costitución, carauterizóse pol decidíu control de tolos puertos de montaña polos que s’acedía a Asturies, destinando batallones asgaya a la llinia de defensa que se compara al Maguinot francés, un bayurosu complexu de fortificaciones defensives llevantaes en plenu monte con piedra y formigón: casamates, trincheres, parapetos, búnkers de galería… un llabor de fortificación que representó un trabayu titánicu pa una xente ensin cuasi medios que dio la so vida nuna amuesa de resistencia heróica, resistiendo con una correllación de fuercies ñidiamente desproporcioná a la so escontra, al exércitu facista español, aidáu entós pola Llexón Cóndor, l’aviación nazi.
La emportancia hestórica d’estos fechos non solo cai nel interesáu escaezu, sinón que los ñicios físicos de los mesmos van sintiendo’l pasu’l tiempu y cuerren pelligru de desaniciu si nun se ponen los medios afayaizos pal so caltenimientu. Poro, Andecha Astur propón la robla d’un conveniu de coperación pente’l Gobiernu d’Asturies ya’l de Castiella y Lleón pa l’aprebación de Planes de Caltenimientu y Revalorización Hestórica de les fortificaciones militares de los montes d’Asturies y Lleón, afalándo a sendos gobiernos a cooperar pa regular la so conservación. La propuesta inclui la necesidá de señalización, integración en rutes, inclusión n’actividaes de promoción del turismu con enfotos culturales y hestóricos, la necesaria formación de guíes turísticos y la fechura de campañes istitucionales d’espardimientu, preseos llegales que tendríen de garantizar el futuru les fortificaciones asitiaes n’Asturies, asina comu les qu’anguañu s’alluguen en tierres lleoneses.
Nuria Prendes
This work is licensed under a Creative Commons Attribution 4.0 International License.
