L’aparente inutilidá de les denuncies y l’estigma qu’entá se caltién sobre les víctimes fae qu’una descomanada cantidá d’abusos nun seyan cuntaos. La complicidá de los altos cargos de la ilesia en xeneral y del arzobiespu d’Uviéu en particular faelos responsables de que continúen los abusos dientro l’ámbetu relixosu
Una investigación que recueye 451 casos de rapacinos abusaos en tol Estáu inclui dos denunciaos por asturianos qu’acudieron al arzobispu d’Uviéu pa pidir ayuda, ensin qu’esti tomare denguna midía al respeutu, de manera que los sacerdotes implicaos nos abusos continuaron non solo exerciendo dientro la ilesia asturiana sinón en contautu direutu con menores.
Jesús Fernández ye un de los sacerdotes acusaos por una de les sos víctimes nel seminariu. Nel 2011 l’arzobiespu recibió una carta informándolu del casu, a lo qu’esti restó importancia al casu, citando a la víctima pa un aconceyamientu personal al que nunca acudió. Enxamás nun s’abrió investigación y Jesús Fernández continuó comu cura n’Hevia, Sieru, fasta morrer, seique la so víctima acudió a la ilesia onde seguía dando misa a acusalu en persona.
L’otru casu recoyíu ye’l d’una muyer que nel 2015 tamién denunció los fechos por carta al arzobiespu d’Uviéu, depués de la infructuosa denuncia presentá 13 años anantes por parte de la so ma ante l’obispáu. Eusasio Sánchez Fonseca, el sacerdote acusáu de pederastia, morrió a entamos d’añu, exerciendo entá de sacerdote ya ensin que s’abriere dala investigación.
Aparte del d’encubrimientu d’abusos sesuales a Jesús Sanz acusase-y de los delitos d’apropiación indebío, falsedá documental, estafa y usurpación de la personalidá na venta de padremoñu de la istitución Lumen Dei por valor de 12’7 millones d’euros.
Llucía F. Marqués
This work is licensed under a Creative Commons Attribution 4.0 International License.
