Nuna Asturies na que’l so presidente ronda mui de cerca los 70.000 euros al añu, el 54% de la población trabayaora ye mileurista o menos

La tasa d’actividá n’Asturies (relación pente les persones n’edá de trabayar y les que de fechu tienen contratu) ye de les más baxes del Estáu y d’Europa, menos del 50%. D’esos pocos que trabayen, más de la metá tan perbaxo del despectivu términu de “mileurista” col que se define al trabayaor precariu, al que nun da p’algamar a fin de mes.

Un venti por cientu de los trabayaores cobra bien perbaxo del Salariu Mínimu Interprofesional y  más del 13% de la población asturiana sobrevive con 500 € o menos al mes por unidá de consumu. Entantu, Adrián Barbón percibe una media de 5.700 euros al mes, más de lo que munches families tienen pa pasar l’añu y lo mesmo qu’un trabayaor mediu cobra en seies meses.

Sicasí, acordies l’Axencia Tributaria, la media salarial asturiana ye de 25.000 euros añales, gracies al 3% de la población que percibe perriba los 63.000 euros al añu, incluyendo daqué más d’ocho mil que ganen más de 70.000 y 2.000 que perciben la obscena cantidá de 150.000 euros al añu, inflando la estadística.

Nestos llaceriosos datos influi asgaya la dependencia del seutor servicios, especialmente turismu y hostelería, del que viven ocho de ca diez asturianos con trabayu y que tien un salariu mediu inferior a los 14.000 añales. Entantu, l’enfotu de les alministraciones asturianes sigue tando n’invertir nel espoxigue de, precisamente, esti seutor, afitando la precariedá a llargu plazu.

This work is licensed under a Creative Commons Attribution 4.0 International License.