Asturies perdió más de 30.000 contratos de magar el 2008
Aporta setiembre y medra’l paru. Ye lo que s’espera al finar el branu nun país que depende del turismu estacional de baxa calidá y que pon les sos esperances nos precarios trabayos de la hostelería. Espérase que l’apioramientu de les cifres de paru vaiga a más nos caberos meses, entá se pue tirar un pocu más del branu.
Les cifres ataquen sobromanera a les muyeres, que son 403 de los 518 nuevos paraos, y a los menores de 25 años, pente los que’l paru medra cuasique un 4% frente al 0’7% pente los adultos, lo que da idega del escenariu de precariedá que vive la mocedá asturiana y desplica les tases d’emigración, la despoblación, la falta de ñacimientos ya en suma, el declive poblacional ya económicu del país.
En términos interanuales Asturies tien 2.445 paraos menos que l’añu pasáu, pero la baxada de paraos nun se debe a la xeneración d’emplegu sinón al amenorgamientu de la población activa (persones de 16 años o más que trabayen o busquen emplegu) , que foi de 8.800 persones solo nel caberu trimestre. Comparando a más llargu plazu, nos caberos 14 años perdiéronse 32.545 contratos y hai 11.542 persones más nel paru.
Redaición InfoAsturies
This work is licensed under a Creative Commons Attribution 4.0 International License.
