Les II Xornaes del Vigulín Tradicional n’Asturies tendrán llugar en L’Infiestu los díes 23, 24 y 25 de setiembre de 2022
El festival, presentáu güei na Casa Conceyu de Piloña, revindica la tradición del vigulín nel conceyu como una seña d’identidá cultural única dientro’l panorama la música asturiana, y tres del ésitu de la primer edición constátase que Piloña ye yá la capital del vigulín tradicional n’Asturies.
La organización destaca l’asistencia tantu de músicos como de públicu na edición anterior, ésitu que pretenden repetir con una programación más ambiciosa y diversa, ufriendo actividaes pa toles edaes.
Na programación d’estes xornaes participen delles asociaciones y coleutivos tanto piloñeses como
asturianos baxo la coordinación de l’Asociación LaKadarma y l’Ayuntamientu de Piloña.
Les xornaes arrancarán el vienres cola conferencia El vigulín nes investigaciones del ATOAM, de Xosé
Ambás y Ramsés Ilesies seguida del II Alcuentru de vigulín tradicional d’Asturies.
El programa d’actividaes del sábadu inclúi’l Cursu El vigulín pal baille tradicional asturianu: Repertoriu y recursos estilísticos, impartíu por Dolfu R. Fernández, Rubén Bada y Santi Galguera; pa la reciella, el taller Restolando, de David Varela; y los conciertos de los grupos folk Rodrigo Martínez Trio (Llión) y Calea (Asturies), siguíos de DJ Fañagüeta na carpa del festival na piscifactoría de L’Infiestu. Amás, una
pareya tradicional de vigulín y bombu, percorrerá les cais del pueblu el sábadu pela tarde.
Tanto’l sábadu como’l domingu pela mañana les cais tarán animaes por La Banda Latira!. Darréu d’ello habrá un tallerín de baille asturianu siguíu del I Vermú en Danza na carpa del festival y el cuentu musical El vigulín de Ramonín, d’África Domínguez.
Amás dende’l día 11 la esposición El vigulín tradicional nel conceyu de Piloña, podrá visitase peles cais de L’Infiestu. A lo llargo’l fin de selmana los visitantes podrán tastiar el Pinchu Vigulineru en dellos establecimientos del pueblu.
Tolos detalles de la programación podrán consultase nes redes sociales del eventu.
Redaición InfoAsturies
This work is licensed under a Creative Commons Attribution 4.0 International License.
