La empresa VayVen Delivery, que reparte mercancia p’Amazón, obligá a camudar de conveniu y pagar un añu d’atrasos a los trabayaores
El Xulgáu de lo Social Númberu 1 d’Uviéu vien de declarar que la plantiya de la empresa VayVen Delivery SL, empresa dedicá al repartu de mercancies d’Amazon, tien de rexise pol Conveniu de Tresportes d’Asturies y non pol que venía aplicando la empresa, Conveniu Estatal de Mensaxería
Ello ye asina en base al ámbetu funcional del Conveniu de Tresportes en relación cola actividá cola que s’identifica la empresa, que correspuende nidiamente al tresporte de mercancies. El xulgau considera amás comu actividá fraudulenta y contraria a los intereses de la plantiya l’intentu por parte les empreses implicaes d’aparentar una modificación de l’actividá empresarial que nun coincidía cola realidá.
La sentencia conderga a la empresa al abonu de les diferencies salariales dende un añu anantes a la interposición del conflictu coleutivu.
Seique la sentencia pue ser recurría, dende la CSI considérenla una victoria perimportante que nun sedría posible, reconocen, ensin la valentía y perseverancia tantu de los trabayaores afeutaos comu de la estaya sindical de la CSI na empresa.
Llucía F. Marqués
This work is licensed under a Creative Commons Attribution 4.0 International License.
