Los fechos remóntense al mes de xunu, fecha na que los vecinos  entamaron a dar avisu del mal estáu d’una arqueta allugada na zona d’arruelu pa la reciella.

Un mes más tarde, ya ensin que se punxeren en marcha les aiciones afayaices pa iguar el desperfechu, el conceyu da permisu pa cellebrar nel mesmu espaciu les actividaes de la Fiesta de la Peral, col resultáu d’al menos una neña fería.

Les protestes vecinales, nun entamu de pallabra, pasaron entós a costituyir una denuncia oficial ente la Guardia Civil por parte d’un vecín de la zona.

Nel escritu presentáu denúnciase l’abandonu de la zona de xuegos infantiles, col consiguiente riesgu pa la reciella, y remémbrase a los miembros de la Corporación Llocal que tan suxetos a responsabilidá penal y civil  polos actos y omisiones realizaos nel exerciciu del so cargu, ello ye, que son llegalmente responsables de los acidentes que se produzan por consecuencia del so desdexamientu. En concretu, denúnciase la dexación de funciones por parte l’alcalde ya’l conceyal responsable ya que, pesi a tar alvertios va meses “A día de güei l’arqueta siguen ensin iguar y la zona ensin llendase pa prevenir incidentes nuevos” polo que’l denunciante solicita “que s’investiguen los fechos y les sos responsabilidaes tanto civiles como penales al haber yá una persona firida” .