La propuesta pa un Turismu Caltenible que presentó Andecha Astur inclúi la regulación d’una Ecotasa y la definición d’un nueu modelu turísticu

L’actual modelu turísticu que carez Asturies allónxase asgaya de los estándares de turismu de calidá deseyables, ye un turismu probe, de mases, irrespetuosu pa cola identidá, paisaxes y paisanaxes asturianos que satura los servicios públicos, xenera emplegu estacional y precariu, complica la vida a quienes viven en fasteres turistizaes y dificulta les actividaes económiques tradicionales.  Ye por ello que ca añu son más les Cases Conceyu que recueyen el maltar de la vecindá con esta triba de turismu.

Ante esta situación, los partíos na Xunta nun ufren soluciones completes y seguimos careciendo la Llei de Turismu llantada pol PSOE d’Areces (2001), enfotá namás en facer caxa y non nel futuru d’Asturies.”Más de venti años con una llei enquivocá y ruina” denuncien dende Andecha. “Una llei que vende una imax d’Asturies comu “paraísu” onde too val”.

Nesos venti años Podemos pidió namás un camudu na llei, va 6 años: regular la figura’l guía rural, ya Izquierda Unida pidi una ecotasa parcial, calteniendo l’actual ruina de modelu turísticu. Ta nidio que’l restu de partíos españoles defenden un turismu de mases que beneficia les grandes empreses y disprecia la identidá asturiana.

Adrián Barbón, pel so lláu, escaeció les sos promeses elleutorales: revisión de la Llei de Turismu, entamu d’un sirviciu d’anovación turístico, aprebación una Llei Integral de Presones mayores que recueya los sos drechos y necesidaes en materia d’arruelu y turismu, etc

Namás el nacionalismu asturianu d’esquierdes lleva años ufriendo una propuesta que faiga que’l turismu n’Asturies ” dexe de ser ún de los problemes d’Asturies y se convierta nesa fonte de trabayu dignu y arguyu xustificáu que pue ser”. Por tercer añu consecutivu, Andecha Astur presenta nes Cases Conceyu la so propuesta pa una Llei de Turismu Caltenible.

La so alternativa sofítase nuna nuea llexisllación, una Llei de Turismu Caltenible n’Asturies, qu’incluya l’aplicación d’una ecotasa y la definición d’un nueu modelu turísticu, “que permitiere meyorar les condiciones de vida de los habitantes de los conceyos más afeutaos pola actividá turística y, en xeneral, de toa Asturies, respetando al tiempu la nuesa identidá.”

Nuria Prendes

This work is licensed under a Creative Commons Attribution 4.0 International License.