La subcontrata d’Arcelor vien de roblar un conveniu qu’apiora entá más les llamentables condiciones llaborales nes que, baxo menacies, caltienen a los sos emplegaos
Demientres los más d’ocho años nos que la empresa Continental Rail SLU lleva prestando los sos servicios encargándose del personal de maniobra de ferrocarriles n’Arcelor Mittal Xixón y Avilés, toos aquellos trabayaores que ficieron cualisquier intentu por meyorar les condiciones llaborales de la empresa foron despidios ensin contemplaciones.
Esi ye’l sistema pol que la empresa caltién fasta agora un nivel de precariedá inxustificable, ñegando incluso drechos fundamentales comu les vacaciones añales, que deben a los sos emplegaos dende’l 2021, obligando a facer xornaes de fasta 16 hores continues, vulnerando los descansos y ñegando la conciliación familiar, tou ello a fuercia de menacies de despidu, per otru lláu cumplies.
Un casu concretu d’esta situación ye la que carecen los tres dellegaos sindicales de la CSI, llegalmente escoyios polos trabayaores y colos que de magar entós la empresa caltién un especial ensañamientu, fasta’l puntu que decidieron, pesi a les menacies, denunciar ante Ispeción de trabayu los fechos, una bones que la situación entamaba a causar riesgos llaborales pa ellos y los compañeros. Dende la CSI faen responsables de la situación non solo a Rail SLU sinón a Arcelor, comu responsable subsidiaria al contratar los servicios d’esta.
En xunetu la empresa firma en Madrid un conveniu específicu, abandonand0’l de la costrución, nel que se yos incluyía fasta agora, amontando les hores de trabayu ensin compensación económica, ensin recoyer dala fórmula de xubía salarial y lo más llamativo, prohibiendo específicamente’l drechu a la fuelga.
Ante esta situación, los trabayaores opten por una protesta na que participen toos, de manera que nun tengan cabida les represalies individuales y de magar esta mañana entamen una fuelga indefinía a tiempu parcial, con paros en tolos turnos fasta que consigan una negociación afayaiza.
Llucía F. Marqués
This work is licensed under a Creative Commons Attribution 4.0 International License.
