Un camión fuera de control desfizo un de los doce horros estilu Villaviciosa que valieron pa datar esti estilu, característicu poles sos talles
Na tardi del martes 11 d’Ochobre, na llocalidá de Sama de Grau, un camión d’obra perdió’l control y esbarrumbó un de los horros más emportantes del conceyu moscón. Trátase d’un de los doce exemplares del sieglu XIV que tan dataos n’Asturies, d’estilu Villaviciosa, el tipu d’horru más antiguu del país y declaráu Bien d’Interés Cultural.
Ye’l segundu casu esti añu d’un horru baltáu por un camión, depués del esbarrumbe del horru los Escarapos el pasáu mes de xunu, polo que igual ye mester valorar esi riesgu n’otres pieces d’emportancia pa evitar futuros acidentes
Fasta’l llugar nun s’averó denguna delegación de proteición del padremuñu, pero si dellos miembros de l’Asociación del Hórru Asturianu, que la mesma tardi del acidente tuvieron valorando la situación, echando un gabitu y asesorando a los propietarios del horru, que tienen la intención de llevar alantre cuantu anantes les llabores de recuperación, na midía de lo posible, d’esta perimportante pieza arquiteutónica.
Redaición InfoAsturies
This work is licensed under a Creative Commons Attribution 4.0 International License.
