Sentimientu y solemnidá nos homenaxes a Belarmino Tomás y los Mártires de Carbayín

13 Ochobre, 2022

Nos dos actos recalcóse la emportancia de deprender del pasáu pa, nel presente, conseguir la mesma xunidá d’aición algamada n’Ochobre del 34 pa lluchar pol futuru d’Asturies

“L’aprendizaxe que mos dexó la Revolución d’Ochobre del 34 foi l’alianza obrera y la necesidá d’axuntar fuercies y facer les coses en xunión, en comuña comu pueblu. Dexonos esi aprendizaxe y otru igual d’emportante, la necesidá d’escoyer Asturies comu marcu específicu de llucha de la clas obrera”. Mario Arbesú

Alredor de trenta persones aconceyaron ayeri pa rindir sintíu homenaxe a los héroes de la Revolución Asturiana d’Ochobre del 34. Primero nel cimenteriu de Carbayín, onde un monumentu rinde homenaxe a les 24 persones que perdieron la vida comu represalia española, una bones ya se firmare’l pautu col que finare la revolución y que fore xabazmente incumplíu pol gobiernu de la República Española, comu fexo notar na so intervención Llucía Fernández Marqués.

Nel so discursu lligó esa represalia tamién al sistemáticu desaniciu económicu, cultural y social que carez Asturies dende entós, destacando la emportancia de xunir fuercies teniendo, comu ellos fexeron, el marcu social de clas ya’l marcu xeográficu d’Asturies. La primer parte l’actu finó cola solemne entrega por parte de David M. Rivas d’un ramu felechu delantre la tumba de los mártires, coles pallabres “Por que foron, somos, porque somos, serán”.

Darréu los actos desplazáronse al cimenteriu de Pando, onde reposen los restos de Belarmino Tomás, presidente d’Asturies, onde un llargu pasiellu d’asturines escoltaron el camín d’un rapacín que posó na tumba la ufierta floral d’homenaxe, anantes de que Mario Arbesú fexere la so sentía intervención, na fexo alusión, pente a otres coses, al vandalismu de quienes estrozaron les plaques n’honor a Belarmino, agora renovaes, resaltando el nulu reconocimientu oficial d’un llugar y un personaxe de tanta relevancia na hestoria d’Asturies, ya que nun hai dalu panel, lletreru nin placa oficial que reconoza’l llugar onde reposa el presidente del Conseyu.