El sábadu 22 d’ochobre n’Uviéu, manifestamientu’n sofitu de les trabayaores del Serviciu d’ Atención a Domiciliu, que nun se rinden nin se rendirán fasta conseguir unes condiciones de trabayu y un serviciu d’atención dignos
Pesi a la robla por parte los sindicatos españoles mayoritarios d’un alcuerdu cola patronal, col que francieron la fuelga indefinía y engañaron a la opinió pública, les trabayaores nun dan p’atrás nes sos revindicaciones y continúen en pie pa defender los sos drechos. La evaluación de riesgos llaborales, aporfien, nun se negocia, desíxese, lo mesmo que la remunicipalización del SAD, el reconocimientu de les enfermedaes profesionales o la redución de la edá de xubilación, pente otres desixencies del coleutivu.
Sabiendo que’l d’Atención a Domiciliu ye un serviciu qu’afeuta o afeutará a tola población, especialmente con una población tan avieyada comu l’asturiana, llamen a toos y a toes a participar nesti manifestamientu, faciendo visible’l sofitu de los asturianos nel so conflictu.
La cita ye esti sábadu 22 d’ochobre a les doce del mediu díi n’el Bulevar El Vasco.
Redaición InfoAsturies
This work is licensed under a Creative Commons Attribution 4.0 International License.
