Los cientros escolares tienen orden de permitir les faltes d’asistencia a los escolinos que participen en “grupos folclóricos”

Lydia Espina López robla la carta que se fizo aportar nestos díes a los cientros educativos, na que s’encamienta a los mesmos que se “xustifique y facilite” la participación de los escolinos nos actos de sumisión monárquica previstos pa los díes 27 y 28 d’ochobre. A la Conseyera abulta-y que formar parte del avezáu despliegue d’españolidá rancia nel qu’añu tres añu nos somorguien a los asturianos cola esculpia los Premios Principiegos ta perriba la formación de los escolinos.

¡Onde va aparar! ¿Quién querría que los sos fios deprendan, por casu, logaritmos o formulación química pudiendo participar nun actu sacáu de la más fonda Edá Media?

Nun pueo dexar de visualizar aquellos cuentos de cuando neña, nos que reis con capa d’armiñu ya inseparable corona recibíen magnánimos los diezmos de cientos de súbditos postraos a los sos pies. La misión de la reciella asturiana nesi escenariu nun sedría otra que la de ser los bufones, los baillarines esóticos que dan el toque folclóricu a la función.

Namás espero, señora Conseyera, que xustifique tamién les faltes a los estudiantes qu’esi díe decidan ponese del otru lláu de la barrera policial pa, asturina en man, vivir el momentu dende una perspeutiva más acordie col llugar y la época na que viven y llamalos a la cara lo que son -pente otres coses- fartones.

Llucía F. Marqués

This work is licensed under a Creative Commons Attribution 4.0 International License.