Llucía F. Marqués
Cuasique nos teníen convencios de que queríen llendar el gastu enerxéticu cuando aporten (si, n’ochobre) les lluces navidiegues con un 29% más de presupuestu
Escaparates amataos de nueche, aires acondicionaos restrinxios, monumentos ensin allumar y, lo más importante, cais en penumbra en tolos barrios de Xixón. La “crisis enerxética” fizo una llamá al xacíu y reduxéronse los consumos. Amás, camudamos la hora “pa aforrar una hora de lluz”.
Y cuando ya cuasi nos creyemos esi esfuerciu controlaor aporten les Navidaes. Si, Nadal entama agora n’ochobre, les lluces ya tan nes cais de Xixón, compitiendo direutamente con Samaín y si se descurien, con esto del cambeu climáticu, cola playa.
El Conceyu Xixón, una ciudá na que viven alrodiu de 500 persones ensin techu, nun país con un 28% de probitú infantil, onde munchos llares nin suañen cola calefación y nun contestu nel que la crisis enerxética y económica emburria con fuercia, decide subir la inversión en lluces navidiegues un 29%, fasta roblar un contratu pa les dos prósimes temporaes por valor de cuasi millón y mediu d’Euros, una cifra que daría pa pagar la factura de la lluz del mes a más de 9.000 llares.
Menos mal que tenemos un gobiernu socialista.
PD: A ver si con esi presupuestu yos da polo menos pa respetar la toponimia oficial.
This work is licensed under a Creative Commons Attribution 4.0 International License.
