Entantu n’Asturies el paru medró nun 1’4%, n’España amenorgó en cuasi una décima porcentual

Esti ye un mes que d’avezu rexistra una fuerte creación d’emplegu, ya que depués de la cayía de la rama de servicios en setiembre, la contratación na rama la educación aveza xenerar un fuerte espoxigue de los afiliaos, qu’esti añu foi enforma moderáu.

Asturies preslló’l mes con 62.639 persones en paru, 850 más que’l mes pasáu, lo qu’implica un xorrecimientu d’un 1’4%. La industria ye la que mayor xorrecimientu porcentual del paru carez, un 6’9% qu’implica a 305 persones; esti datu ye esmoleceor, puesto que la industria ye una de les estayes qu’ufre emplegos más estables. Los servicios tamién carecen una fuerte baxada, seique a esti altor del añu yera más esperao. Un total de 470 trabayaores del sector, l’1,1%, perdió el so puestu esti mes.

El paru espoxiga especialmente pente los homes, medrando un 6’2% la cifra de mozos que nun tienen trabayu. Robláronse menos contratos qu’otros meses d’ochobre, pero la bona noticia ye que son de más calidá, con un 38% d’ellos indefinios.

No que cinca a les prestaciones por desemplegu, cabe destacar que’l númberu de paraos que nun la recibe medra y supera les 31.500 persones, la metá de los que tan en paru. Amás, más de la metá de los que les cobren perciben alrodiu de 450 € .

Dende Andecha Astur declaren qu’hai que señalar a los responsables del “desmantelamientu industrial y del desaniciu socioeconomicu ya identitariu d’Asturies: los socesivos gobiernos sucursalistes de FSA- PSOE y del PSOE estatal, col sofitu d’IU n’Asturies y del PP” y buscar la solución na so propuesta de creación d’un  frente ampliu asturianu d’izquierda.

Alberto Rodríguez

This work is licensed under a Creative Commons Attribution 4.0 International License.