El casu de Rubén, el neñu xixonés de 14 meses que necesita una donación de médula anantes de cumplir los dos años, fai que munchos asturianos ten plantegándose’l facese donantes. Pa ello solo tendrán que dedicar unes hores
Rubén tien catorce meses, un hermanu que lu quier un montón, una sonrisa enorme y ‘mucopolisacaridosis tipu un’ o síndrome d’Hurler. La incapacidá de producir una enzima fai qu’acumule tosines que lu enfermen de siguío, una enfermedá rara y dexenerativa que lu lleva a facer tresfusiones selmanales y que puede causa-y problemes mui graves de güesu, oyíu vista y mesmo mentales.
Afortunadamente, esiste una posibilidá de dai una bona vida: namás necesita un donante compatible de médula y eso ye lo que se ta buscando nuna carrera escontra reló, ya que sólo sedrá efeutiva si se realiza nos prósimos diez meses.
N’Asturies les donaciones xestiónales el centru comunitariu de sangre y texíos. Asina que’l primer pasu a dar cuando decidimos donar médula ye llamar a esti organismu nel teléfonu 985232426, onde recibiremos información precisa de cómo donar, onde hai que dir y comprebarán el cumplimientu los requisitos pa llevar a cabu la donación.
Pa tener mayor probabilidá d’ésitu nesta intervención, la Organización Nacional de Tresplantes afita como requisitos principales tener pente 18 y 55 años y tar sanu, ello ye nun carecer dala enfermedá soscetible de ser tresmitía al receutor nin carecer denguna enfermedá que puea poner en pelligru la so vida nel procesu de donación.
El siguiente pasu ye un cenciellu analís de sangre y una robla, tres lo cuál el donante queda iscritu como tal nel Rexistru mundial de Donantes de Médula Osea (REDMO). Ye importante tener en cuenta que nun se puede donar médula pa un paciente concretu, sinón qu’una bones iscritu’l donante ta disponible pa cualesquier persona compatible que lo necesite, con independencia d’aú more.
Agora toca cruciar los deos: namás una de cada 40.000 persones ye compatible, una auténtica llotería pa los enfermos que, como Rubén, tendrán más númberos pa ganar cuantes más persones faigan la preba.
Cuando por fin apaeza’l donante afayaizu sólo tendrá que dedicar unes hores de la so vida pa meyorar la de Rubén. El procesu de donación de célules ma se faese por un de los dos procedimientos vinientes: mediante punción fecha’n quirófanu o mediante aféresis, un procesu nel que se alministren al donante “fautores de xorrecimientu hematopoyéticu” y dempués faese una tresfusión direuta del so sangre al enfermu.
El casu de Rubén impáutanos, porque ye un neñu, porque lu sentimos cercanu, porque pescanciamos la congoxa de los sos pás. Pero son munches les persones pendientes de recibir una donación de médula, les sos vides bien valen unes hores de la de nueso.
This work is licensed under a Creative Commons Attribution 4.0 International License.
