Almeida abandonó la mesa de negociación escoltáu ya ensin algamar dengún alcuerdu, pero afirma que “tornarán a sentase a negociar la selmana que vien”

El cabezaleru de la patronal asturiana de la hostelería, Almeida, acudió a la mesa de negociación con promeses de “meyores sustanciales”. Sicasí, a la hora de la verdá foi imposible algamar un alcuerdu, daqué colo que los trabayaores del sector ya cuntaben. Un bon grupu d’ellos esperaba al empresariu a la puerte de la sede de CCOO, onde tuvo llugar l’aconceyamientu, recibiéndolu a la voz de  “¡Almeida patrón, yes un esplotaor!”, continuando la so protesta demientres duraba el conceyu y esperando entá a la so salida.

El presidente abandonó la mesa de negociación anantes d’algamar dengún alcuerdu y pidió el despliegue d’efeutivos policiales que lu protexeren de los sos trabayaores. Los policies non solo lu escoltaron na salida sinón qu’identificaron a dellos manifestantes, llegando un de los axentes a encarase direutamente a un representante d’Andecha Astur, Miguel Ánxelu Agudo Rodicio, que yos echó en cara la so defensa de la patronal, ensin qu’afortunadamente se produxeren enfrentamientos. Aparte del partíu nacionaliegu, namás taba presente como representación política Daniel Ripa, l’ex-secretariu xeneral de Podemos n’Asturies, inabilitáu pol so partíu.