El premiu apurriráse nesta “Edición cero” al propiu Vicente García Oliva
El 17 d’avientu, de magar les 12 la mañana, va tener llugar la AsturCON, la I Convención de Fantasía Asturiana, na sala d’esposiciones de Llaboral Centru d’Arte y Creación Industrial. Mientres la convención anunciaráse la creación del Premiu Fontenebrosa a la meyor obra de fantasía espublizada n’Asturies.
El nome del premiu ya un homenaxe a la obra de Vicente García Oliva, el primer escritor n’asturianu de fantasía infantil y xuvenil. Nesta edición otorgaráse el Premiu Cero y va apurríse-y al propiu García Oliva, pola so trayectoria lliteraria.
Na convención contaran con 5 meses redondes nes que van participar dalgunos de ls meyores autores y editoriales del xéneru fantásticu d’Asturies, yá seya n’asturianu o n’español. Tamién entamarán el primera Speed-dating d’Asturies ente escritores ya editoriales de xéneru fantásticu. “Como nes pelis americanes, vamos dar cinco minutos a ca escritor/a que quiera propone-y una hestoria a una de les editoriales participantes. ¿Condiciones? Que s’apunten al eventu al traviés de la páxina web y el so manuscritu seya de xéneru fantásticu”.
Mientres l’eventu tamién podrá visitase la esposición inmersiva El mundu ye viesca, de Rotor Studio (aforu máximu 30 persones). El títulu de la obra ta inspiráu pol llibru homónimu d’Ursula K. Le Guin, una escritora que revolucionó la ciencia ficción per mediu d’una hibridación lliteraria con otros campos de la conocencia como l’antropoloxía, el feminismu o la ecoloxía.
Pa terminar, mientres tola convención va tar abiertu un puestu onde tarán disponibles los llibros d’autores y editoriales participantes nel atriu de Llaboral Centru d’Arte y Creación Industrial, nel marcu de LABshop Iviernu 2022, un eventu que dende avientu de 2008 axunta a un nutríu grupu de creadores, diseñadores y editores independientes nel prestixosu centru d’arte.
Los autores confirmaos hasta’l momentu son: Helena Seoane, Ana Pereira, Dam Fernández, Nicolás Bardio, Adrián Carbayales,Xon de la Campa, Rudy Martínez, Felicidad Martínez, José Manuel Uría,Yosune Álvarez, Blanca Fernández, Andrés Fernández, Tiberio, Moisés Colunga, Dani Sierra,Vicente García Oliva, Alex Sebastián, Kai C. Torel, Abel Martínez, Lorena Miranda y otros nomes que tán entá pindios de confirmar. Les editoriales que confirmaren la so presencia son Radagast, Sportula, HT Publisher, Orpheus Ediciones Clandestines y Trabe.
Alberto Rodríguez
This work is licensed under a Creative Commons Attribution 4.0 International License.
