Activistes d’Asturies pol Clima ApC entamaron un actu simbólicu col lema “Por un plan forestal pal monte asturianu y esfrecer el planeta, ocalitos non” a la entrada de la Conseyería de Mediu Rural y Cohesión Territorial EASMU (Uviéu)
Los ecoloxistes desplegaron una pancarta de 15mx3m con mensaxes alusivos a esta cume sobro biodiversidá, la realidá d’emerxencia climática y la necesidá d’otru plan forestal p’Asturies.
Esta convocatoria asítiase nel marcu de la cellebración de la COP15 sobro Biodiversidá de les NNUU, que ta cellebrándose’n Montreal del 7 al 19 avientu 2022, polo que esti actu convocase pa espresar la esmolición compartida poles organizaciones sociales presentes nesti cume no que cinca a resultaos, alcuerdos, y les respuestes que se dean a la crisis de biodiversidá y realidá d’emerxencia climática, unos resultaos que dependen de l’aprobación del Marcu Global pa la Biodiversidá Post-2020.
Dende ApC consideren necesaria la presión social frente a les insuficientes respuestes globales. Asina, multitudinaries protestes concentráronse a les puertes de la COP15, denunciando la falta de compromisu per parte los representantes gubernamentales demostrada fasta la fecha, neto que na ceremonia d’apertura’l discursu del Primer Ministru de Canadá, atayada por activistes indíxenes.
De forma especial quieren señalar daqué yá plantegao na COP27 d’Exiptu: la insuficiente concenxa y comprensión de lo que representa la emerxencia climática y les sos conexones cola crisis de biodiversidá. La perda de biodiversidá contribúi al calentamientu global y esti, de la mesma, agravase de forma xorreciente. Nesti sen, ye indispensable apostar pola preservación efectiva de la biodiversidá como una de les estratexes necesaries pa frenar el cambéu climáticu; daqué obligáao pal conxuntu de gobiernos na midía na que intervienen nestos ámbitos y les sos polítiques concretes tienen impactos nel calecimientu o esefrecimientu del planeta, como ye’l casu del Plan Forestal asturianu, bien ayenu a esta realidá y obligaciones.
Un Plan refugáu polos colectivu ecoloxistes, pos reproduz la lóxica mercantilista d’esplotación forestal, nel casu asturianu centrada nel ocalitu y la so posible espansión al traviés del nintex. Daqué que, amás d’arrenunciar al monte autóctonu y la biodiversidá asturiana, nun contribúi al esfrecimientu’l planeta. Dende ApC entienden que ye necesaria otra política forestal que respuenda a la lóxica, necesariamente global, de la transición ecolóxica y social xusta que reclama la situación d’alarma climática.
Redaición InfoAsturies
This work is licensed under a Creative Commons Attribution 4.0 International License.
