La banda punk-rock de Grau ruempe cola so llinia nes cuatro nueves canciones ya’l videuclí de “Mar Adientro”que vien d’espublizar en plataformes dixitales

Ta acabante d’asoleyar en toles plataformes dixitales Mala Relixón, l’EP nuevu de Misiva. Nesta sétima grabación d’estudiu, la banda moscona ruempe cola llínia d’escuridá y rabia de los sos primeros discos, pa presentar un soníu más averáu al del cenciellu “La Misiva“, espublizáu’l pasáu marzu. Los cuatro cantares dan-y dan una vuelta de tuerca al estilu, a la temática y a la música que lleven faciendo dende va más de 12 años.

Nesti EP la banda punk rock presenta «cuatro cañonazos enllenos d’enerxía, de riffs mui curiaos y de voces sorprendentes». En cuantes a les lletres, n’elles falen de «frayar colos patrones y los programes nos llanten dende neños y de volver al orixe, a la esencia de caún». «Ye un glayíu d’esperanza y un invitación a mirar pa dientro, que ye onde tán al final toles respuestes», comenta’l grupu.

Mala Relixón grabóse nel OVNI Estudio, en Bonielles, baxo la dirección técnica de Pablo Martínez, encargáu de la producción, mezcla y masterización del discu. Amás vien acompañáu del videocip “Mar Adientro“, obra de Titi Muñoz, y con un diseñu fechu pol so artista de cabecera y tamién moscón, Rubén Fernández.

Alberto Rodríguez

This work is licensed under a Creative Commons Attribution 4.0 International License.