Nun actu de malabarismu estadísticu, los medios de comunicación faense ecu de que’l 2’8% de la población retrucó a una entruga que nun se-yos fizo

La Encuesta de “Características Esenciales de la Población y Viviendas” (ECEPOV) del INE entruga únicamente poles llingües oficiales, ello ye, n’Asturies faese entrugando a la población pol so usu del español. Secundariamente entrúgase polos conocimientos d’otres llingües, tamién oficiales nel so país d’orixe, comu l’inglés o’l francés. Nun s’entruga a la población sobro los sos conocimientos d’asturianu.

Ello asina, los asturianos retruquen a les entrugues del cuestionariu y nun mencionen la so llingua. Namás un 2’8% la población, espontaneamente, aporfia en que s’incluya nel informe’l so conocimientu d’asturianu. Estrapoláu esi datu a los medios de comunicación del aparatu tenemos titulares comu “Menos del 3% de la población habla bien el asturiano”.

Interpretar la non rempuesta a una entruga que nun se plantegó comu rempuesta negativa ye, ensin más, una falacia. Pero ye qu’amás la situación de diglosia, l’ausencia d’una ensiñanza reglada y xeneral de la llingua que permita l’alfabetización y, sobre tou, la falta d’autoestima al respeutu de munchos falantes que carecieron d’acosu llingüísticu, fae que seya difícil que los asturfalantes se definan comu tales ensin que siquiera se-yos de la opción.
Poro, son abondos los coleutivos de defensa la llingua que reclamen al INE una desplicación nidia sobre l’estudiu y la so interpretación, afalando a la Conseyería de Cultura del Gobiernu d’Asturies a actuar de manera urxente pa que s’esclarien estos datos.

Redaición InfoAsturies

This work is licensed under a Creative Commons Attribution 4.0 International License.