Andecha Astur despidió’l 2022 con un sentíu homenaxe a Andrés Solar, el poeta que, en pallabres de Llucía Fernández, “sintetizó en cuatro versos tolo que ye la propuesta política d’un nacionalismu d’izquierdes. Prúyemos un pueblu llibre, que nome cola so voz los sos collacios ya’l pan, prúyemos un pueblu llibre y una Asturies Dixebrá”
La cita foi al pie del cimenteriu nel que reposen los restos del escritor, activista políticu y axitaor cultural, na parroquia de Deva que lu vio xorrecer. La ceremonia foi presidía por un retratu del autor al pie de la placa qu’Andecha Astur punxo va décades na so memoria y entamó cola música de gaita que tantu-y prestaba, dando pasu a la intervención de Llucía Fernández.
La vocera d’Andecha Astur recalcó’l fondu valir d’Andrés Solar en toles estayes de la so vida, rescamplando especialmente la coherencia y claridá de la so visión nacionaliega, “que resumía con cenciellez visionaria, sabiendo que la única forma llóxica de vivir n’Asturies ye siendo asturianu, ye lo único intelixente”.
Depués d’un repasu a la curtia vida y los munchos llogros d’Andrés, Llucía insistió en que’l so mayor méritu foi el de facer país por tolos medios posibles, remembrando que n’Asturies son asgaya los que, d’un xeitu u otru, faen país nel so díe ente díe, llamando a la xunidá de los asturianos pa revertir el camín al desaniciu y crear futuru p’Asturies, un mensaxe que dende Andecha Astur vienen repitiendo nos caberos años. “Hai cientos de miles d’asturianos que, si nun lo faen too, ponen caún la so migaya pa caltener esti país en pie y si somos quien a acomuñalos, a facer que faigan ún nuna sola Andecha tendremos cientos, miles d’Andresos sacando alantre Asturies. Apostando polo de nos, siendo asturianos, porque si nun lo facemos nosotros… ¿Quién lo va facer?”.
Una bones finó la intervención posáronse al pie del retratu claveles encarnaos y felechos n’honor al poeta, col acompangamientu de La Flor del Agua tocao a gaita, que punxo’l puntu final al emotivu actu.
Redaición InfoAsturies
This work is licensed under a Creative Commons Attribution 4.0 International License.
