Comu ya ye vezu a entamos d’añu Iniciativa pol Asturianu consulta a los asturianos qué foi la meyor noticia pa la nuesa llingua nel añu que pasó
La consulta empecipió’l 3 de xineru y va acabar el vienres 13 d’esti mes y pa votar basta con entrar na páxina d’Iniciativa y escoyer fasta quince d’ente 33 noticies positives pal asturianu d’estremaos ámbetos, incluyendo visibilidá, internacionalización, toponimia, universidá y otros.
D’esta manera, la organización pretende escoyer, pente medies d’una votación popular n’interné, la meyor noticia pal idioma nel pasáu añu 2022, visibilizando los progresos que, seique seles por demás, van dándose nel espardimientu y defensa del asturianu.
La organización apuntó que “tamos mui contentos porque esta iniciativa estrenóse nel añu 2013 y cumple 10 años recoyendo bones noticies pal idioma. Cada exerciciu añal que pasa va medrando’l númberu de participantes y la cantidá de noticies positives pal idioma. Tamién val pa facer un repás a tol llabor d’Iniciativa pol Asturianu y pa comprobar cómo añu a añu la llingua asturiana tien una repercusión positiva nos medios”.
Pa Iniciativa pol Asturianu esta votación ye importante porque “con esta campaña pretendemos facer llegar a la ciudadanía asturiana delles bones noticies pal nuesu idioma. Amás, dende Iniciativa pol Asturianu queremos recoyer lo positivo d’esti 2022 pal asturianu y treslladar que la llingua asturiana sigue ganando presencia nes instituciones y normalidá na sociedá”.
Amás, los y les participantes van participar nun sortéu d’un llote de llibros n’asturianu.
Alberto Rodríguez
This work is licensed under a Creative Commons Attribution 4.0 International License.
