Cultures. Revista Asturiana de Cultura ye una publicación editada añalmente pola Academia de la Llingua Asturiana que naz nel añu 1990 col envís d’asoleyar trabayos qu’afonden nel estudiu de la etnografía y l’antropoloxía d’Asturies y, dacuando, d’otres zones culturales
El númberu 26 de CULTURES, correspondiente al añu 2022, agospia artículos qu’estudien temátiques comu’l papel de la muyer como personaxe y como narradora na tradición oral, la función ancestral de los güesos nel caltenimientu físicu del ánima, la deportificación de los xuegos tradicionales asturianos y la tresformación de los sos espacios o les competiciones de bateles n’Asturies. A ello amiéstase tamién un monográficu sobre’l llobu n’Asturies, dende l’análisis del problema socioeconómicu y cultural d’anguaño hasta un repasu históricu y xurídicu de los métodos de caza.
Pieslla’l númberu Roberto González-Quevedo, direutor de la revista, coles reseñes de: Una antropología del amor. De Oriente a Occidente, de Josefina Pimienta Lobato, Lo que el tiempo trajo (y lo que se llevó). Cincuenta años de mirada antropológica, d’Adolfo García Martínez, y Romances tradicionales de Eva González Fernández, de José Manuel Fraile Gil.Collaboren en Cultures tanto especialistes nes materies citaes, como otros estudiosos ya interesaos na conocencia d’estes disciplines. Buscóse especialmente, y más nos númberos monográficos, la collaboración de persones de los distintos conceyos y fasteres de cultura asturiana, bonos conocedores de la so realidá. Poro, esta ye una publicación pervarolatible pal estudiu de la llingua asturiana, en cuantes que nos sos trabayos apaecen vocabularios específicos y terminoloxíes aplicaes a les práutiques culturales tradicionales males d’atopar n’otres obres d’esti calter.
Alberto Rodríguez
This work is licensed under a Creative Commons Attribution 4.0 International License.
