Lata de Zinc acueye’l 4 de febreru esti eventu nel que van tocar AliciaVillanueva y Luis Álvarez Pola, Loína, Algaire y Llevólu’l Sumiciu
El primer festival de música moza n’asturianu va axuntar a cuatro grupos d’estremaos estilos col denominador común de tener componentes pente los 18 y los 34 años.
El formatu, qu’amiesta aspeutos d’una gala con conciertos al usu, revindica les sales comu un espaciu afayaizu pa qu’espoxigue la música de raigañu. Con ello esta aniciativa trata tamién de dar puxu al relevu xeneracional na música n’asturianu. Musicasturiana.com cellebra el so quintu añu de furrulamientu con esti conciertu que ye toa una declaración d’intenciones pal futuru, afitando’l so respaldu a la música n’asturianu de los autores más nuevos.
Los conciertos dirán dende l’asturianada, cola actuación d’Alicia Villanueva (Bimenes, 2000) y Luis Álvarez Pola (Bárzana de Quirós, 1994) fasta los ritmos afrollatinos y la música lletrónica de Pablo y David Alonso (1993 y 1994), pasando pol folk amiestáu con estilos contemporáneos de les mierenses d’Algaire ya’l folk acústicu de calter atlánticu de Loina, grupu formáu polos hermanos Andrea Joglar (1991) a la flauta y Rodrigo Joglar (1988) xunto a Julio Rodríguez (2004).
Les entraes cuesten diez euros, con un descuentu de tres euros menos pa menores de 26 años.
Alberto Rodríguez
This work is licensed under a Creative Commons Attribution 4.0 International License.
