Les muertes por esti motivu quintuplicáronse nos caberos tres años, acordies los datos del sistema de xixilancia de mortalidá diario. Nel 2021 -l’añu en que la fola de fríu estremu Filomena xeló Europa entera- rexistráronse 110 muertos poles baxes temperatures y nel 2020 foron 32 los fallecimientos por esta xida, cifra duplicá namás nel primer mes del 2023, cuando 73 asturianos  nun tuvieron comu facer frente al fríu. Otros 21 nun aguantaron febreru y 19 más morrieron de fríu en marzu, subiendo la cifra a 25 n’abril. A ellos hai que sumar les 14 persones que llevó’l fríu esti mes d’avientu, un total de 152 muertes nun añu que precisamente destacó poles sos altes temperatures, siendo’l más calurosu de magar 1961.

Ello ye, nun foron temperatures especialmente baxes les que causaron esti progresivu xorrecimientu, sinón les dificultaes de los asturianos pa protexese del fríu. L’incrementu de los precios enerxéticos, xunío a la mayor precariedá económica de la población, imposibilitó l’usu de calefación nun peraltu porcentaxe de llares; pero amás la carestía de la vivienda, que n’Asturies medró esti añu un 10’3%, fae que seyan munchos los asturianos que viven en llugares con baxes condiciones d’habitabilidá o mesmo na cai.

Poro, cuando falamos de muertos de fríu, sedría más correcho dicir muertos de probitú.

Redaición InfoAsturies

This work is licensed under a Creative Commons Attribution 4.0 International License.