Con esta son cuatro les sentencies xudiciales contraries que recibió Podemos nel caberu añu, incluyía una por vulneración del drechu a la llibertá sindical

El Tribunal Cimeru de Xusticia d’Asturies (TCXA) declaró  improcedente’l despidu del ex Secretariu d’Organización de Podemos Asturies, Rogelio Crespo, al considerar la TCXA que Crespo sí que caltuviera una relación llaboral con Podemos mientres más de trés años y, poro, nun podía ser consideráu como un emplegáu temporal, sinón indefiníu, obligando a la formación morada a la so realmisión o al pagu d’una indemnización.
Crespo foi despidíu al tiempu qu’otros compañeros, dos díes antes de la entrada a valir de la reforma llaboral aprobada por Podemos, que fai los contratos indefiníos por defectu. Esto asocedía nun contestu d’acusada rivalidá ente l’ex Secretariu Xeneral, Daniel Ripa, del que Crespo yera partidariu, y l’entós recién  Secretaria Xeneral, Sofía Castañón.
Con esta sentencia, trés de los cinco trabayadores despidíos pola actual dirección autonómica de Podemos fueron declaraos nulos o improcedentes, entantu que les dos a les que reconocieron impagos salariales piensen presentar recursu de casación, al considerar que’l so despidu  tien xides polítiques.
La reacción de l’actual dirección, liderada por Sofía Castañón, ante esta sentencia, foi señalar que la mesma nun reconoz vulneraciones de drechos, sinón “que el so contratu allargó dos meses más del plazu máximu dexáu pa los d’obra y serviciu”, lo que de fechu redundó na perda de los drechos cde Rogelio Crespo como trabayador indefiníu.

Redaición InfoAsturies