L’afayu ye obra de Fon S.P, apasionáu de la cultura ástur y responsable del proyectu y páxina web Ástures, que dedica bona parte del so tiempu a buscar asentamientos de la Edá del Fierro, anque esti ye’l so primer descubrimientu d’un nuevu llugar arqueolóxicu

Un acidente xeográficu llamativu dio la pista, una forma reconocible para esti espertu rastreador, n’una serie de cráteres nel terrén que dexaron les canteres d’esplotaciones caliares de los sieglos XIX y XX nos conceyos d’Uviéu y Mieres.

“A un golpe de vista paez entevese un sistema de aterrazamientu, paecía qu’aquello tenía pinta d’asentamientu castreñu… cortáu por una enorme cantera eso si” rellata’l responsable del descubrimientu, refiriéndose a una zona que pasaría desapercibía a cualesquier profanu.

L’asentamientu, al que llamó Peñales, yera un llugar muncho más grande, pero una cantera llevó la metá del monte nos años 50 del sieglu pasáu. La posición algama unos 430 metros d’altor y un desnivel relativu de barganal de 30 metros dende la so cota más baxa al cume. Pol lladral esti ta defendíu por un cantil vertical qu’algama unu llargor d’unos 200 metros llineales y altores d’ente 25 y 30 metros. Preferimos nun dar indicaciones del allugamientu esactu pa nun afalar espolios.

Fanjul Peraza , arqueólogu, averóse al llugar a comprobar los barruntos, dando la razón a les sospeches de Fon, pero lo que dio la pista definitiva foi una pieza topada va años nesa paraxa, apurrida por un llector de Ástures, un cantu d’una sítula, o calderu de bronce, de la edá del Fierro. La entrevesgada decoración que tien na so superficie, con enxareyaos circulares, ye bien típica del ámbitu galaicu y ástur de la Edá del Fierro polo que  vien confirmar que nel castru de Peñales hubo un asentamientu de la Edá del Fierro, perteneciente con muncha probabilidá a la etnia de los Luggones.

La pieza ye de gran valir y yá se dio avisu del so afayu al Muséu Arqueolóxicu d’Asturies, al que van faer entrega de la mesma en cuanto terminen los estudios que-y ta realizando Fanjul Peraza.

Yá unviaron un primer borrador a una revista científica por que quede publicáu y siguen investigando sobro la información cartográfica disponible, pero la so intención ye atopar financiamientu pa faer una escavación arqueolóxica.