El conceyal de Turismu de Xixón, Santos Tejón, robló güei en FITUR l’alcuerdu pol que l’asociación d’empreses especializaes na organización de viaxes d’incentivu, convenciones y eventos corporativos va celebrar el so alcuentru añal na ciudá asturiana
SpainDMCs, l’asociación qu’axunta a les axencies de viaxes más prestixoses, especializaes na organización de xuntes, incentivos y eventos (MICE) d’empreses y entidaes internacionales, escoyó Xixón pa celebrar del 24 al 26 de marzu d’esti añu la so convención añal. Mediu centenar d’altos y altes executives, representantes de les 35 empreses asociaes, van aconceyar na ciudá asturiana pa tratar los problemas principales, tendencies y oportunidaes del sector.
Esti alcuentru, que se confirmó güei en FITUR, va sirvir pa que Xixón s’afite como sede de xuntes y eventos internacionales y destín de viaxes d’incentivos gracies a la gran capacidá de los asistentes d’influyir nes decisiones de los sos veceros y veceres sobre’l destín de les sos operacione.
L’acoyida d’esta convención ye’l resultáu de los esfuercios que s’entamen nel marcu de la mesa de concertación social Xixón Tresforma p’atrayer turismu MICE. Na anuncia realizada en FITUR esta mañana afayábense’l conceyal de Turismu de Xixón, Santos Tejón, el direutor de Visita Xixón, Daniel Martínez, la presidenta de SpainDMCs, Fay Taylor, y el direutor executivu de l’asociación, Luis Díaz.
Van ser tres díes nos que les asistentes van participar en meses reondes y presentaciones pa tratar temes empresariales y profesionales d’importancia pa la industria MICE. Tamién se van caltener contautos comerciales cola industria MICE de Xixón p’amosar a los y les participantes los productos turísticos nuevos y estratexes del destín.
De forma paralela a les sesiones de trabayu, ta diseñándose un programa social pa que los participantes conozan la ufierta, el tipu d’actividaes, la calidá de productu, restoranes y agospios de Xixón. Va ser una oportunidá pa que los miembros de SpainDMCs ufran a les multinacionales, empreses y sociedaes coles que trabayen la posibilidá de realizar na ciudá asturiana les sos xuntes y eventos.
Según los datos caberos disponibles enantes de l’andanciu, en 2019 los miembros de l’asociación operaron un total de 3.558 grupos MICE nel Estáu, de los qu’un 75% yeren internacionales. Nestos grupos participaron un total de 608.918 persones.
Redaición InfoAsturies
This work is licensed under a Creative Commons Attribution 4.0 International License.
