“Somos tan poques y tamos tan apuraes que’l nuesu estrés recae sobre los ususarios” declaren les afeutaes del cientru xixonés d’atención a la tercer edá
El cientru Xerontolóxicu Jovellanos, allugáu nel antiguu hotel del mesmu nome y de magar xunu d’esti añu perteneciente al grupu AVS Millenium Salud, nel que tamién s’integra l’Hospital Covadonga, lleva tiempu desatendiendo les demandes de los sos trabayaores reclamando más personal y más medios colos que dar un serviciu de calidá a los usuarios del cientru.
Denuncien que, por mor d’esta falta de medios y personal, la llimpieza y desinfeición ye insuficiente nes istalaciones, cuestión perdelicao al tratar con xente de salú vulnerable. Amás, reconocen que les quexes de los usuarios acerca de la ruina calidá y cantidá de les comides son fundamentaes, asumen la mala atención pero afirmen que nun puen facer más polos usuarios del cientru y reclamen que se contrate más personal y se meyoren les condiciones del xeriátricu, ya qu’agora mesmo la empresa ta vulnerando tanto los drechos llaborales de les trabayaores comu los de les persones que s’aloxen allí.
Por tou ello, y pesi a la fuerte turbonada que se desencadenó a la hora que taba convocá la concentración, foron decenes les persones que reclamaron frente al xeriátricu que se cumplan los drechos llaborales y los ratios de personal.
Redaición InfoAsturies
This work is licensed under a Creative Commons Attribution 4.0 International License.
