Por muncho qu’aporfien por dir d’héroes y defensores del país, los socesivos presidentes “socialistes” d’Asturies nun faen sinón sacase la semeya (la mesma semeya) cara a la galería, ensin que s’avanzare res dende’l 2.019
2.019. El presidente del “Principado”, Javier Fernández, revindica la importancia d’un Corredor Atlánticu ferroviariu conectáu colos puertos gallegos y asturianos pa “Reequilibrar un mapa económicu y social ca vegada más entornáu escontra’l llevante español” . Yera’l momentu, non podía esperase más y el so gobiernu diba consiguilo. “Agora ye la hora del Norte” dicía’l Mudu, lluciendo una flamante pancarta col lema “Corredor Atlánticu Noroeste”, xuntu colos entós presidentes de Galicia y Castiella, Alberto Núñez Feijóo y Juan Vicente Herrera.
Cuatro años más y la pancarta -si nun ye la mesma, una idéntica- yá nun paez tan flamante; tamién el mensaxe ta gastáu y ye’l mesmu “Vamos defender el Corredor Atlánticu Noroeste por una cuestión de xusticia, un futuru sociu económicu n’igualdá de condiciones col llevante español” declara’l nuevu presidente del PSOE.
Camuden los nomes, eso si, Adrián Barbón, Alfonso Fernández Mañueco, Alfonso Rueda, y camuda tamién el presupuestu solicitáu para realizar les obres. Si en 2019 el costu del tramu asturianu yera de 3.100 millones, agora nel 2023 el PSOE reclama p’Asturies 2.760 millones, 340 menos. O daquién diba a llevar más dineru nel 19 o daquién ta pidiendo de menos nel 23.
Enriba, les semeyes, resume perfectu de la inamovilidad de la política asturiana y bona amuesa de como d’avezu’l PSOE asturianu sabi lo qu’hai que faer, reclama lo qu’hai que faer, pero nun lu fai.
Redaición InfoAsturies
This work is licensed under a Creative Commons Attribution 4.0 International License.
