Profesores ensin plaza y places ensin profesor. Esa ye la situación que se vive n’Asturies nesti momentu. Tolos martes, la Conseyería d’Educación publica les places que ye necesario cubrir, tanto n’Educación Primaria como n’Educación Secundaria. Y tolos xueves, cuando dende esta Conseyería s’espublicen les axudicaciones, vese que dalgunes de les places nun cunten con un profesor o profesora que les ocupe.

Esta última selmana, tres places de Llingua Asturiana en Secundaria quedaron ensin cubrir. Y esta nun ye la esceición, sinón la norma dende qu’entamara’l cursu, lo mesmo en Primaria y en Secundaria. Toles selmanes un fenómenu idénticu dende setiembre.
Los de llingua nun son los únicos casos nos qu’asocede, ye una situación que se repite n’otres especialidaes como Lengua Castellana, en Secundaria. Sicasí, les de les materies de llingua son los casos más llaceriantes, yá que’l so profesoráu  cunta con menos drechos que’l restu de los trabayadores de la educación asturiana. Al nun esistir la especialidá docente, tampoco nun esiste la posibilidá de presentase a oposiciones, polo que costituin un grupu de trabayadores con menos drechos que los sos compañeros y compañeres.

Dende0l sindicatu recalquen que los más perxudicaos son les y los estudiantes, ya que munchos d’ellos queden meses ensin una persona que-yos ponga clas. “Nun se respeta’l so drechu a la educación. Y, al añu siguiente, una parte bien bultable decide abandonar l’asignatura, con tolo qu’ello supón a la escontra de la tresmisión del idioma“.
Dende CSI Educación desixen a la Conseyería d’Educación que busque dalguna fórmula pa poner solución a esta situación, que sedría menos grave cola aprobación de la especialidá, permitiendo que los derechos del profesoráu de les nuestres llingües propies ten n’igualdá col restu.

Redaición InfoAsturies

This work is licensed under a Creative Commons Attribution 4.0 International License.