Asturies tien drechu a plenes competencies en materia ferroviaria, pero la FSA-PSOE lleva décades ñegándose a qu’Asturies les asuma, entantu el que fore un serviciu d’alta calidá va derivando por desenfotu nun serviciu deficitariu

El contratu axudicáu por Renfe en 2020 ascendía a un total de  258 millones € colos que la empresa Construcciones y Auxiliar de Ferrocarriles (CAF) tenía de fabricar 31 trenes colos que meyorar el sirviciu de FEVE n’Asturies y Cantabria. Les istrucciones aportaron mal, ensin que fasta agora queden nidies les responsabilidaes, y los trenes nun pasen pelos túneles. La consecuencia son tres años de retrasu, un tiempu inasumible pa un mediu de tresporte públicu, del que depende l’Asturies rural y que lleva décades amoriando pente retrasos y averies. Dende Andecha Astur pidin por ello la dimisión de Barbón y anuncien que van presentar ante’l gobiernu español -vía EH Bildu- una riestra d’entrugues al respeutu pa esclariar lo ocurrío.

La noticia atopó a Barbón por sospresa, siendo la so primer declaración que “sabía qu’había un retrasu colos trenes, pero nun me desplicaron el motivu rial”, una esculpia que p’A.A. ye falsa “Los intereses políticos que comparte y la rellación fluyía que tien col Gobiernu español faen increyible esta esculpia, una mentira a la que Barbón recurre pa intentar salvar el so prestixu nun tiempu preelleutoral”. Los nacionaliegos acusen al presidente de sumisión y falta d’enfotu pa coles necesidaes de los asturianos.

Pero sobre tou reclamen que se reconozan a Asturies les plenes competencies en materia ferroviaria que l’Estatutu d’Autonomía otorgáu a Asturies, magar lo ruinu que ye, permite. Dende’l 2006 nun se trespasen competencies a Asturies, reconociéndose asina los sucesivos gobiernos comu incapaces de xestionar los intereses asturianos, que prefieren dexar en manes del gobiernu español. En concretu, va tiempu que tendríen d’asumise les competencies ferroviaries y, mirando pa exemplos riales comu  Euskotren o Metrovalencia, facer del ferrocarril asturianu un vraeru mediu de tresporte públicu, caltenible, de calidá y articulaor del territoriu, que coneute Asturies consigo mesma y col esterior, como ferramienta pa frenar el despoblamientu. Cabe entrugar si eso ye precisamente lo que quieren evitar.